S'ARDIA

S'Ardia

Pro su pitzinnu est festa, est preghiera
magia, incantu e ammiratzione.
Creschet sognande su caddu, s'isprone
e a coronamentu sa bandera.

A pitzoccu, s'at atza, in s'ischiera
s'eventu afrontat cun emotzione.
Pro respirare aperit su prummone,
pasadu s'arcu s'aria est prus lizera.

Pagas bortas b'at brincos de zigante
proine meda e cantos rimpiantos!
Calchi 'orta afatzadu si est su lutu.

Ma a bi partecipare est importante!
Poi finida, b'at festas e cantos
e-d-est cuntentu fintzas chie est rutu.

A betzu mannu a candela finida
est una 'e sas bellesas de sa vida.

Antonio Ignazio Onida